كسراااات مرمريه
فعلا اصعب إحساس لما تفتقد الأذن اللى كانت بتسمعلك ، القلب اللى كان مفتوحلك ، ترمي فيه كل همومك وتسيب عل أكتافه كل حمولك ، وتبكى بحرقه كل الزمن اللى عشته ، وانت متاكد وعارف أنه حضن لا هيكل ولا هيمل منك فى يوم ، حضن كان أمانك وإنت بيوم كنت أمانته .
أحيان كتير تتمنى إن عجله الزمن تقف على مشهد معين ، لقطه معينه ، بترجعك سنين وسنين طويله أوى ، عدت عليك ، فرمتك ودهست أحلامك ، ولما تيجي اللقطه دى تفوقك من موتك المؤقت ، عقلك ينشط ،تحس بطعم اللقطه على لسانك ، تشم ريحه زكراها ، تلمس وجوه كانت فيها بس بتلمسها بقلبك لان للاسف أصبحت سراب ، بس بتشوف تجاعيد ضحكتها ، وحنو كلامها، والدفا فى عيونها، لقطه كده زى مابيقولوا بالعمر كله ، وتتمنى أن التروس تقف عند اللحظه دى ، تتمنى انك تدخل جواها تتعجن فى ملامحها، وتدعى انك متفوقش.
بس للاسف بتلاقي نفسك ركبت تااانى عجله مش بتاعتك ، وتسوق فى طريق حاسس طول عمرك أنه مش طريقك، وتموت تااانى وانت لسه حي 
أمل مخيمر
الكلمات المفتاحية :
شعراء مطلع الالفية